食譜 - 客家鹹雞 (大夫小廚)
鹹雞有人用先醃後煮，亦有人用先煮後醃既方法，今次我用後者方法方便隨時可以食，先食半隻鹹雞，另一半留起下次煮鹹雞粥。鹹雞用鹽帶起雞味，尤其適合無咩雞味既冰鮮雞，我依隻係超市三十零蚊嗰d平價細雞，煮完拍得住酒樓水準 材料： 雞一隻 粗鹽 花椒 八角 沙薑粉(可省略) 做法： 1. 先將粗鹽，混入適量花椒，八角及沙薑粉，用細火慢慢炒乾鹽既水份及帶出香料香味，畢起備用。雞隻清洗乾淨 2. 浸雞方法，煲滾一大煲水，拿住雞頭放雞入水中，浸10秒左右待滾水流進雞腔後拿起雞隻流出滾水，重覆三次令雞腔內温度與外一致，細火不用加蓋浸約35分鐘，浸雞時間視乎雞隻大少，其間要再次拿起雞隻三次保持雞腔足夠受熱 3. 浸熟雞後瀝乾水，用廚房紙印乾雞隻內外水份，趁熱於整隻雞內外均勻塗上炒香左既粗鹽，醃至少兩小時，進食前用熟水沖走所有粗鹽後便可斬雞享用 P.S: 粗鹽一般都比較濕，我會一次過炒乾一整包粗鹽(約600g) 後用瓶儲起方便下次用。另外如果食唔晒留起既雞，建議不用斬但都用熟水沖走所有粗鹽印乾水後才放雪櫃，否則過夜後會太鹹
