大夫小叫

久聞連續十二年獲頒米芝蓮既名廚鄭錦富大名，之前未有機會拜訪上環名人坊舊店，最近得知富哥同另一米芝蓮名廚廚魔Alvin Leung 係中環合作開左新店"廚魔名人坊", 一於約埋同樣係從事飲食業又識食既好友一起去品嘗富哥既招牌菜。 廚魔名人坊裝潢簡潔但貴氣，壁畫及擺設亦充滿藝術感，當然主角始終係食物，嚟之前我仲上網睇過不少富哥既訪問大致了解菜式的由來。一開始上場就先嚟"廚魔三寶"做頭盤，分別係"帶子瑤柱釀日本青椒"，"香煎鵝肝蓮藕盒"及"魚子醬蟹肉小蕃茄"，用料矜貴小巧別緻，尤如高級版本既煎釀三寶，最喜歡係鵝肝處理做法，炸過後香口又濃味。 "燕窩釀鳳翼"拼"饕餮琵琶豆腐"，用上油份高既鮮龍崗雞全翼去骨，再用上湯煨過既官燕毫不吝嗇咁釀滿雞翼，用籤封口後油炸鎖住肉汁。建議第一口試食時就咁先食佢既原味(小心好熱) ，雞皮極香口惹味，喜歡既可以再加少量附上既淮鹽及醬油輕輕提味，啖啖都係燕窩一嚐當富豪既滋味。富哥另一招牌"饕餮琵琶豆腐"內裏混入既臘味同魚肉，炸過後外脆內軟，一樣非常美味。 "椒鹽田雞腿"，非常驚喜既一道菜，調味恰到好處，田雞肉非常新鮮炸完依然非常嫩滑，食完係會一口又一口咁追，全晚最愛既一味菜式。 "涼瓜炒肚尖"又係富哥既名菜，一個豬肚只可以切出少量既肚尖部位，極為珍貴稀有，還要經過繁複既處理同精細既刀工切成薄片，爆炒過既肚尖爽口而不韌，口感特別，配上涼瓜同惹味豆豉，極考功夫既一道菜式。 "是日養身老火湯"係充滿鮮味既中式魚湯，用上大量細條鮮魚泡製，因為無連湯渣上所以不清楚用料，但魚味濃得嚟入口清甜，好飲。 "脆皮妙齡鴿"同"富哥咕嚕肉"兩款都同樣高水準，都係香港人熟悉既味道，跟一般坊間既相比就係味道平衡同口感拿捏既分別，例如咕嚕肉既酸甜度，肉既厚薄，芡汁既濃稠等，細心既就會食得出水準既高低，當然食嘢可以好簡單，覺得好食就夠。 最後係最期待既"富哥招牌炒飯"，用上湯即蒸既白飯，配料用上金華火腿，鮮嫩既細蝦肉同大量葱花，鑊氣十足飯粒分明，一向覺得炒飯係最能睇到一個中廚既水準，依個炒飯係100分