頂級經典扒房 - 茹絲葵牛排餐廳 Ruth's Chris Steak House

為了提早慶祝情人節，今次選擇了依間全世界都非常有名既經典扒房。尖沙咀分店位於尖沙咀中心1樓，店內古典紅木風格裝潢非常優雅，燈光略為柔和既環境，配合中午窗外既自然陽光，有一種舊式既浪漫氣氛。我地今次不選套餐，直接散叫了幾款都係佢地既招牌菜，應該都係一般新客嚟到會選既熱門款式

當日有兩款既餐湯，Loster Bisque 味道層次豐富非常美味，反而Corn Crab Chower 有點太厚身，而且個人不太喜歡粟米味太搶味，但味道依然係出色的

Crab Cakes 又係每枱客枱面都幾乎會見到既一款前菜，一份2件，會體貼咁分開兩碟咁上俾你，蟹肉味好鮮甜又軟滑，建議不用加檸檬汁，個人覺得檸檬會掩蓋了蟹肉既鮮味，必點推介

Ruth's Chop Salad 面層係炸洋蔥，混入了適量醬汁既沙律菜，中間食到有藍芝士，煙肉，蛋，橄欖等材料，但整體味道調得好融和，無話邊一樣材料味道太搶

主角美國USDA Prime Ribeye 16安士，熟度Medium Rare 剛好，牛肉味極濃連肥膏都好食，而且肉質亦夠淋，相信應該係無急凍過既冰鮮牛先有既質感，而且侍應會另放一隻已淋上牛油同調味料既極熱燙手空碟俾你，切完牛扒放在自己空碟上沾上調味，依種食法我都係第一次，個人幾鐘意依種做法，進食時牛扒又保持到熱度，但要留意放上空碟後要盡快食避免被碟同油既熱力overcook左

Creamed Spinach 其實係好食的，但因為食扒食到一半時已經覺得有點飽，所以依款超多Cream既菠菜已經食唔到幾多，兩個人食既話下次可以cut左依款

整體嚟講，環境，服務同食物質素都配得起依度既價錢，而且食過一次知道份量後，下次就可以更精準叫到適合既款式避免浪費食材同金錢，非常滿足既一餐