奧本海默 Oppenheimer IMAX 版觀後感

電影奧本海默好難用簡單評價嚟評論成部作品，但卻可以用一些觀後感想及心得嚟幫未睇既人調整進場前既心態。基本上Nolan 既奧本海默係一部人物傳記電影，除了少量意識流手法拍攝奧本海默既心理狀態，基本上都係屬於寫實形既電影，而且文戲佔左98%既時間，說實話真係無咩必要一定要睇IMAX版本，可能睇菲林版本更有意思。

雖說係文戲主導，但節奏依然緊湊，戲味好濃持續3小時都充滿張力，沒有一個鏡頭係多餘的。一開始已不停穿插係兩場類似聽証會中不斷唇槍舌劍既戲碼，再穿插由奥本海默年青時代直至晚年既經歷，對我嚟講最難消化只係外國人既譯名不易記入腦，好多人物關係好難睇一次就完全了解清楚，因為你不容易記得那些名字是否對應緊你心入面諗緊既角色，反而路蘭跳躍式既時空及場景轉換其實不難跟，劇情亦很直白咁讓觀眾了解到奧本海默所面對既難處及挑戰，尤其當劇情進入曼哈頓計劃時就大致都好易咁理順到不同角色既立場同功能，亦係劇力最濃最集中既時間，建議未睇既人可以維基一下曼哈頓計畫了解當時既時代背景，會更易跟上電影既劇情推進，反而不必維基太多奧本海默既資料，留返空間比電影去展演依位傳奇人物既故事會更有新鮮感。

演員方面，Cillian Murphy 不用說絕對係影帝級演出，完全飾演出一個曠世奇材應有既說明力同演繹到角色複雜既心理狀態，另外Robert Downey 同Matt Damon 既演出都好有說服力，甚至令我一度懷疑係咪佢地嚟，因為我事前無留意仲有邊嗰大牌演員有份演，所以都係睇睇下先留意到應該係佢地嚟，化妝造型同演技都令人好入戲，尤其Robert Downey 嗰老妝好自然，佢今次係奧本海默既演出令我好驚豔，相信任何一個電影獎項評選中Robert Downey 都一定係最佳男配角既大熱

整體嚟講三個小時長度係有必要，但依套絕對唔係popcorn 電影嚟(我真係見到有情侶攞住一大兜爆谷入場) ，嚴肅型戲迷應該會好投入同收晒貨，但依套相信唔會係票房大賣既電影，甚至可能會有好兩極既迴響，但Nolan 迷應該會收貨的。可以睇到一班集結歷史上最聰明既人，去面對及應付咁高層次同咁龐大規模既Project，國家級既國力對壘同最現實既政治博弈，危機四伏既政治處境，絕對係眼界大開，尤其那種政治權力操控底下全無公正可言既偽審訊過程，嗰種無力感同隻手遮天，依家既時勢大家點會唔感同身受，牽涉到政治，權力同利益，咩時代咩國家都係一撚樣。

只要唔好有錯誤既期待，喜歡睇劇情同演技既戲迷，不用想去睇就是了