名師坐陣廚師發辦 - 江戶壽司秀

之前曾到訪過黃埔既江戶壽司秀，奈何當時Omakase 已full 只可坐房散叫Menu 既款式，但隨便叫質素已非常不錯。今次店主邀請左業街非常有名既劉晉維師傅坐陣，當然就要馬上嚟試一試先。

青檸柚子伴鮫鰈魚 - 一向喜愛清新得嚟味道又唔霸道既白身魚，灑上青檸汁及岩鹽後再配上橄欖油，最後加上即磨柚子皮同小菊，配搭特別而簡單精緻

酸醋啫喱三文魚籽伴米崎蠔 - 非常大隻飽滿既岩手縣米崎蠔，配上酸醋啫喱同三文魚籽一起放入口，鮮味培增

野生鰤魚刺身 - 油甘魚類既刺身一向係我至愛，肥美既鰤魚先經過師傅既按摩，令油脂軟化，令入口油脂香更强烈

黑松露醬伴角螺 - 巨型鮮活角螺拍打收縮後口感勁爽，配上黑松露醬一點都無蓋過角螺味道，反而提升左本身清淡既角螺味道

炸京蔥絲鯖魚 - 配上醬汁既鯖魚味道濃郁，炸過既京蔥係神來之筆，聞到聞到嗰陣强烈而特別既香味，配合一起食層次感極豐富，依種配搭適合不同食材，值得參考

蘋果木煙薰火灸赤鯥 - 赤鯥被稱為白身魚中既拖羅而且身價高昂，灸燒魚皮釋出皮下油脂後，入口肥美油香澎湃，加上蘋果木既煙燻香味，提升左味道既層次

秘製醬汁配酒蒸蝦夷鮑魚 - 鮑魚美味之餘，最出色係嗰肝醬，幼滑creamy，非常配合嗰醋飯，最精彩既一款食物

火灸左口魚裙邊壽司 - 醬漬過既左口魚裙邊灸燒完極香甜入口即溶，配合京蔥，醋飯同紫菜，食多10件都無問題

劉晉維師傅縱橫業界30多年，足跡遍及香港、東京、悉尼、意大利及三藩市，閱歷豐富而且幽默建談，因為工作上我都經常接觸日本海產，正好可以請教不同食材既處理方法及心得，劉師傅都願意傾囊相授，食物優秀之餘又都食得開心，而且店舖離黃埔站出口步行只需1分鐘非常方便而且環境舒適優雅，想食高質日本海產絕對可以一試