Jabra Elite 4 最新型號真無線入耳式耳機用後感分享

- 5月 02, 2023

前排忙於處理演唱會製作期間，唔小心遺失咗藍牙耳機，做嘢時處處唔方便，忙完後一直都考慮緊買番邊個品牌好，話曬上一對耳機都用左超過3年，係我第一次買TWS 真無線耳機，大牌子來講，雖然音質都不錯，但睇Youtube 時有輕微delay，聲畫唔同步。而且經常都怕耳塞會甩，不時要調整耳機位置，初時都心慌慌唔安心，老實講一直對藍牙耳機無太大信心。今次剛好收到丹麥大牌子Jabra 新出既入門級TWS 耳機，又係ANC 主動降噪，正好可以用嚟測試一下最新入門級耳機可以去到咩程度既質素。

個人嚟講，耳機最主要係用嚟聽音樂，音質係我最重視既一環。只要音質好，其他功能都係Bonus。試機我一般都會用最常聽、最熟悉既歌嚟試，最常聆聽既都係Indie Rock 類充滿大量失真結他同誇張Delay/Reverb 聲效既音樂如Smashing Pumpkins 或Mogwai 等等，Headphone 表唔表現到嗰層力度同層次感對我好緊要。

先講用後感，音質基本上已無可挑剔，大量不同聲效樂器同時出現都無混濁感同flat 咗既感覺，完全表現到歌曲本身應有既層次感同力量感，底音部份亦恰當好處(好怕一味死重bass 既耳機) ，夠力之餘亦聽到detail 位，甚至聽到一d我平時都無留意既Bass 彈奏細節，而且配合app 可以調整Headphone 既EQ，可以tune 到我覺得最理想既狀態，行藍牙5.2 睇Youtube 時亦没有聲畫不同步嘅delay 感覺。

音質過晒關，就講功能部份，基本上要有既功能佢都有齊。例如行ANC 主動降噪，將耳機外既環境雜音消除，而且仲有非常有用既通透模式，係暫停播放音樂狀態下，只需輕按左邊耳機就能開啟通透模式，能夠喺不需除低耳機狀態下聽到街外既聲音非常方便。另外，仲有一種我稱之為半通透模式，當聆聽音樂時按下左邊耳機，就能聆聽音樂之餘同時都可以一定程度聽到外間既聲音，依個功能係運動時會非常有用，能令使用者對外界發生既事物或聲音有所反應。另外，藍牙多點技術可以同時連接多個Device，例如我平時會有一部公司電話同一部私人電話跟身，我用私人電話聽緊歌時，公司電話有Call 打入就會馬上自動切換至公司電話，完結通話後就自己轉返去私人電話繼續播放音樂達致無縫切換，只需一個Headphone 就可以處理晒兩個電話，而且開啟ANC 功能情況下耳機使用時間可以keep 到一日，表現非常不俗。